Ida

die ida
is bairin
und klunzt nit sou vü
wal klunzn nix bring
hot sie is gfüh

egal ob im stoi
oder in da stubn
ba die leit
zan raunzn und jammern
bleib afoch ka zeit

und tuat sies amoi
loust ihra
souwiesou kana zua

wal zan denkn
hot eh a jeda
söba scho gnua

außer, da bauer
der sog haichstns
bring ma a bier

najo, denkt sich die ida

wenigstens fias
ouschoffn
hot a gspia

doch

wia sie wie imma
iba die stiagn obi geht
wia sie wie imma
va da köllatiar steht
und wia sie wie imma
insgeheim überlegt

ob er a ihra höfn tät
da troust
aus da murauer floschn

schiaßt ihr da mittelfinger
wia va söba
aus da luckatn kittltoschn

schaut aussi
ban louch
und des tuat die ida
hiaz a

wal im unterschied
zum jammern
brauchts zan bier huin
jo wui wirklich
nit zwa